بسم الله الرحمن الرحيم
اليوم ٢٤ فبراير ٢٠١٦
حابة اكتب لنفسي كلام عن التخطيط واقراه بعد كم سنه
كلامي بيكون عن التخطيط لحياتي ،و لأهدافي و لطموحاتي ولكل شي ابيه بالدنيآ والآخرة
قبل ٢٠١٤ ماكنت اعرف شي اسمة تخطيط ولا كنت ابحث عنه ، إلي غيرني سؤال وآحد /
ايش سويتي من ٢٠١١ ( سنة تخرجي ) لين ٢٠١٤ ؟
عن نفسي ماسويت شي غير اني حملت و ولدت في بنتي زوز وكنت اتعلم في الخياطة و الرسم و الاعمال اليدوية فقط تعلم ما نفذت الا الشي القليل الي لايذكر ، بعد السؤال الي صدمني و كان في بداية ٢٠١٤ قررت ابحث عن التخطيط وشلون استغل وقتي وجهدي في الاشياء الي ابيهآ وكيف ارتب اولوياتي وعلى اي اساس ارتبهآ وكثير اشياء قريت و بحثت عنهآ ، وصرت اقرأ الكتب الي تفيدني في هذا المجال بعد ٣ شهور وانا اقرأ وافكر في هالموضوع وكيف السنوات الي ضاعت بدون انجاز قررت ابدأ بداية قوية اعوض فيها الي فات ^^
حطيت لي قائمة نوايآ ل ٢٠١٤ و حاولت قد ما اقدر ما اكثرها واحط فيها الضروريات لهالسنه وقلت في نفسي بس انتهي من تحقيقهآ كلها راح ازيد عليهآ الشغلات الي ابيهآ ، كانت ١٠ اهداف ابي احققها ل ٢٠١٤ وكنت اشوف ان ١٠ مرا قليل على سنه فيها ٣٦٥ يوم ، انا انسانة غير منتجة و مسوفة و بطيئة جدآ و ألهى كثير عشان كيذا قررت ١٠ اهداف فقط كبداية و اشوف نفسي شلون بحققها بعدهآ راح اعرف لنفسي اذا ال ١٠ قليل او كثير او مناسب :)
المهم اهدافي صحيح انها ١٠ بس كانت كبيرة وماقسمتها لاهداف صغيرة عشان يسهل علي الانجاز غير اني مارتبت الوقت ولا الكيفية عشان انتهي من كل الاهداف قبل تنتهي السنه ، في اهداف اشغلتني عن الاهداف الاخرى وفي اهداف انتهت السنه و انا استنى الوقت المناسب عشان انجزهآ وفي اهداف صغيرة تعتمد على اهداف اخرى كبيرة لم تنجز عشان كيذا ما انجزتها وفي اهداف انتظر الوقت المناسب الي أكون فيه رايقة عشان انجزهآ وفي اهدافلضيق الوقت ما فكرت فيهآ ايضا :/
وانتهت السنة وانا ما حققت الا هدف واحد بشكل يرضيني ، باقي الاهداف قطعت فيها اشواط كبيرة و بعضها اشواط بسيطة و ٣ اهداف منها ما اشتغلت عليهآ ابدآ !!
بدت سنة ٢٠١٥ ، قررت تكون سنة جمال و حب و سعادة وانجاز و الوعي عندي ارتفع و تعلمت اقسم اهدافي الكبيرة الى اهداف صغيرة و اسجلها قدام عيوني بالاضافة اني اكتب خطة زمنية لتحقيق كل هدف و تلافيت اخطائي في اهداف ٢٠١٤ ، كتبت قائمة ل ٢١ هدف على الصعيد الديني و الشخصي و المهني و العائلي قسمتهم ل ٤٤ هدف ، اشتريت لي بلانر اكتب فيه خطواتي و اسجل فيه طرق تنفيذ الاهداف والوقت الي انفذها فيه و الحمد لله حققت٢٣ هدف كامل ، و اشتغلت على ٩ اهداف وما انتهيت منها و ١٢ هدف ما اشتغلت عليه لاسباب خارجة عن ارادتي و بعضهم من التسويف ، طبعا ما مشيت على الخطة الزمنية الي حطيتها بس حاولت قدر المستطاع اني انجز و هذا الي طلع معي ^^
الاهداف الي ماتتحقق دائما نآخذها معنا للسنة الجديدة و نكون واعين للاسباب الي ما خلتها تتحقق ونشتغل عليها لين تتحقق و نستفيد اكيد من اخطاء السنه الي راحت و نتفاداها في السنة الجاية ، استفدت كثير من الكتب الي تعلم التخطيط و الاهداف جدا مفيدة و غيرت كثير اشياء فيني ، حطو اهداف لكم دينية و دنيوية و قسموها لاقسام بسيطة تقدرون عليها و ابدأو بالمهم فالأهم ف الاقل اهمية و حطو خطة لتحقيق كل هدف عشان ماتتعارض اهدافكم مع اولوياتكم بالحياة ولا تنسون تقيمون انفسكم و انجازاتكمفي كل سنة عشان تعرفون تقدمكم و وين كنتو و كيف صرتو 3> بالاخير لازم تعرفون ان قليل دائم خير من كثير منقطع اعمال بسيطة يوميا تعمل فرق افضل من اعمال متعبة اسبوعيا او شهريا
وحاليا جهزت قائمة طويلة عريضه ل أهداف و نوايا ٢٠١٦ باذن الله تكون سنة جميلة و سعيدة و منجزة بأذن الله ، مبدئيآ حطيت مايقارب ال ٢٧ هدف وجالسه انجز فيهم ^^
الكتب الي استفدت منها في التخطيط :
- كيف تخطط لحياتك ل د .صلاح صالح الراشد
- فنجان من تخطيط ل عبدالله عيد العتيبي
مواضيع في التخطيط :
- كيف تحدد أهدافك
- كيف تنجز اهدافك بكل سهولة
- مقالات ال د. ابراهيم الفقي
- القراءة في التنمية البشرية
مقولات عن التخطيط و الانجاز :
- ضع الوقت الكافي لانهاء ماتقوم به
- من الجميل ان نضع بصمتنا في الحياه ولو بجزء منها
- سر النجاح يمكن اختصارة في كلمتين : الاخلاص و الجدية
أشياء تساعد ع التخطيط و الانجاز :
- برنامج To Do ع الجالكسي
- kikki.k دفتر بلانر
- لوحة جدارية اكتب فيها اهدافي
هذا ما يحظرني حاليا ممكن ازيد مستقبلا :)
ليست هناك تعليقات:
إرسال تعليق